اوزبیکستان و تاجیکستان هنوز برای تحویل هواپیماهای افغانستان پاسخ ندادند

عنایت‌الله خوارزمی، سخنگوی وزارت دفاع طالبان به خبرگزاری آناتولی ترکیه گفته است اوزبیکستان و تاجیکستان تاکنون به درخواست‌ این گروه برای بازگرداندن هواپیماها و بالگردهای افغانستان پاسخ نداده‌اند.

با سقوط حکومت پیشین افغانستان ده‌ها هواپیما به اوزبیکستان و تاجیکستان منتقل شدند.

ملا محمد یعقوب، وزیر دفاع طالبان در ماه جنوری در مراسمی در کابل گفته بود که حکومت طالبان هرگز اجازه نخواهد داد که این هواپیماها توسط همسایگان شمالی افغانستان ضبط یا مورد استفاده قرار گیرد.

ملا یعقوب در آن زمان از اوزبیکستان و تاجیکستان خواست که صبر طالبان را آزمایش نکنند و حکومت این گروه را مجبور نکنند تا گام‌های تلافی‌جویانه ممکن برای بازپس گیری هواپیماها بردارد.

از آن زمان تاکنون چندین حمله به تاجیکستان و اوزبیکستان شده که داعش مسئولیت آن را بر عهده گرفته است.

عصمت‌الله ایرگاشف، نماینده ویژه رئیس جمهور اوزبیکستان برای افغانستان پیشتر گفته بود این وسایط نظامی جزئی از اموال امريکا است و با موافقت واشنگتن،‌ در اوزبیکستان نگهداری خواهند شد.

مقام‌های امریکا نیز به صراحت گفته‌اند که اوزبیکستان و تاجیکستان هیچ برنامه‌ای برای تحویل این هواپیما به طالبان ندارند.

به گفته وزارت دفاع امریکا تا ۲۱اگست سال ۲۰۲۱، ۴۶ فروند هواپیما در اوزبیکستان و ۱۸ فروند دیگر در تاجیکستان پرواز کرد. این هواپیماها شامل بالگردهای Mi-17 UH-60 و همچنین PC-12 ،C-208 ،AC-208 و A-29 هواپیماهای بال ثابت هستند.

سخنگوی وزارت دفاع طالبان در گفتگو با خبرگزاری آناتولی آمار متفاوتی ارائه کرده و گفته در زمان اشرف غنی، نیروی هوایی افغانستان ۱۸۳ هواپیما و بالگرد داشت که نزدیک به ۷۰ فروند آن سال گذشته، به اوزبیکستان و تاجیکستان منتقل شدند.

عنایت‌الله خوارزمی افزوده هواپیماها و جنگنده‌هایی که در افغانستان باقی ماندند و تخریب شده بودند، در ماه‌های اخیر تعمیر شده‌اند. او مدعی شده تاکنون ۷۰ فروند هواپیما و بالگرد نظامی را تعمیر کرده‌اند.

داعش در افغانستان

سخنگوی وزارت دفاع طالبان به رغم نگرانی‌ جهان از حضور داعش و القاعده در افغانستان، مدعی شده که امنیت در سراسر افغانستان تامین شده و هیچ منطقه‌ای در کشور تحت کنترول داعش نیست.

با این حال او اذعان کرده که داعش گاهی حملاتی انجام می‌دهد، اما این به معنای قدرتمند بودن این گروه در افغانستان نیست.

عنایت‌الله خوارزمی درباره درگیری‌های مسلحانه با نیروهای مرزی پاکستان و ایران هم گفته که هرازگاهی درگیری‌هایی رخ می‌دهد، اما این درگیری‌ها «سوء تفاهم‌» است.


Source link

دیدگاهتان را ثبت کنید

آدرس ایمیل شما منتشر نخواهد شدعلامتدارها لازمند *

*